Puisi: Di Ujuang Sanjo, Lalai ka Gantuangan

Langik di ateh Payokumbuah lah mulai merah
Buruang-buruang tabang mudiak ka sarangnyo
Biduak pulang ka pangkalan, taranak masuak ka kandang
Tando hari lah baganti jo malam yang tanang

Tapi di suduik-suduik cafe, galak masih mambangkak
Asok rokok bakabaun jo harun nyo kopi
Anak mudo kito duduak malingka, lupo di hari
Lupo jo panggia mulo, lupo jo janji diri

Mandayu-dayu suaro azan dari corong surau...
"Hayya 'alas-shalah..." panggia Sang Khaliq tibo
Tapi kito masih asyik basenda gurau
Saolah-olah nyao indak ka putuih, badan indak ka fana

Dima lataknyo Adat Basandi Syara’?
Dima rago Syara’ Basandi Kitabullah?

Kok Maghrib kini lah diagiahkan ka meja kafe
Sadangkan sajadah lah lamo rindu ka dahi kito

Oi anak mudo, pamenan mato...
Ingatlah pituah urang gaek kito dahulu
"Jan bakaliaran di hari sanjo, pamali nantinyo"

Bukan sekadar takuik jo hantu, tapi takuik kito kehilangan restu
Takuik iman habih dikunyah maso, takuik hiduik indak barakaik lai

Pulanglah...

Sabalun pintu taubat tatutuik rapek
Sabalun sanjo baganti galok nan abadi

Basuahlah muko jo aia wudhu nan janiah
Sujuiklah di hadapan Illahi, di sela doa yang lirih

Oleh:
Sefriza Rahma, S.Pd.I
Guru Matematika SMP Negeri 8 Payakumbuh